Ağcabədidə baş verən yol-nəqliyyat hadisəsi zamanı xəsarət alanların SON VƏZİYYƏTİ açıqlandı

Ötən gün Ağcabədi rayonunun Hindarx qəsəbəsi ərazisində baş verən yol-nəqliyyat hadisəsi zamanı xəsarət alan şəxslərin son vəziyyətləri açıqlanıb.

Ağcabədi Rayon Mərkəzi Xəstəxanasından (RMX) King.Az-ın sorğusuna cavab olaraq bildirilib ki, dekabrın 22-də, saat 14:45-də Ağcabədi rayonu ərazisində baş verən yol-nəqliyyat hadisəsi səbəbi ilə xəsarət alan üç nəfər (ikisi kişi, biri qadın olmaqla) RMX-yə hospitalizasiya olunublar.

"Onlara bədənin müxtəlif nahiyələrinin çox sayda travması diaqnozu təyin edilib. Pasiyentlərin hər birinə zəruri tibbi yardım göstərilib və onlar ambulator müalicə üçün evə buraxılıblar", - deyə məlumatda bildirilib.

Qeyd edək ki, qəzaya düşən KIA markalı avtomobil 44 günlük Vətən müharibəsi şəhidi Məqsəd Həsənovun ailəsinə məxsus olub, xəsarət alan Aynur Mahir qızı Həsənova isə şəhidin bacısıdır.